Ein pobl

Ymunodd Charmaine â SAYH ym Medi 2023. Fel Cyfarwyddwr Rhanbarthol Dros Dro i Lundain, hi yw wyneb cyhoeddus y sefydliad ar lefelau rhanbarthol ac mae hi'n gweithio gyda heddluoedd a chymunedau i fynd i'r afael â'r her o adeiladu ymddiriedaeth a hyder helaethach mewn plismona.

Mae hi'n gyfrifol am sicrhau bod ymchwiliadau'n cael eu cyflawni mewn ffordd amserol a chyson, bod penderfyniadau ar sail tystiolaeth ac yn dryloyw, a bod ein gwaith yn cael ei ddeall, ei rannu'n eang ac yn helpu i ysgogi gwelliant.

Mae cefndir Charmaine yn y sectorau cyhoeddus ac nid-er-elw ehangach. Yn fwyaf diweddar roedd hi'n Gwnsel Prydeinig yn Sbaen gyda'r Swyddfa Dramor Cymanwlad a Datblygiad. Yn flaenorol treuliodd fwy nac 20 mlynedd yn arbenigo mewn gwella perfformiad - adolygu, archwilio ac ailgynllunio mynediad cwsmeriaid at wasanaethau cyhoeddus fel ymgynghorydd annibynnol yn ogystal â chydag Asiantaeth Gwella a Datblygu Cymdeithas Llywodraeth Leol, y Comisiwn Archwilio, Cynghorau Dinas Nottingham a Sir Nottingham.

Gweithiodd Charmaine hefyd mewn datblygiad cymunedol a thramor ar faterion mor amrywiol â thrais domestig, tai a digartrefedd, gwahaniaethu yn y system cyfiawnder troseddol, a datblygiad cynaliadwy.  Mae hi wedi bod yn wirfoddolwraig ar hyd ei hoes – yn diwtor ysgol, llywodraethwr ysgol, aelod panel adolygu parôl, aelod bwrdd, mentor, a chymhorthydd cyntaf iechyd meddwl achrededig. Mae Charmaine yn Gadeirydd Annibynnol ar gyfer cynllun peilot Adolygiadau Llofruddiaethau Arfau Tramgwyddus y Swyddfa Gartref. 

Ymunodd Emily â SAYH yn Ebrill 2017 fel Arweinydd Tîm Gweithrediadau. Daeth hi'n Rheolwr Gweithrediadau yn 2020 ac mae wedi gweithio yn rhanbarthau'r Gogledd-Orllewin a'r Gogledd-Ddwyrain, cyn cymryd ei rôl o Gyfarwyddwr Rhanbarthol y Gogledd-Ddwyrain. Mae Emily wedi bod yn Wneuthurwr Penderfyniadau ar gyfer nifer o ymchwiliadau proffil uchel, cymhleth, gan sicrhau gweithio ar y cyd ag adolygiadau amlasiantaethol a hyrwyddo lleisiau dioddefwyr a theuluoedd.  Mae hi wedi gwneud nifer o argymhellion lleol a chenedlaethol, â'r nod o wella plismona. Ers 2019 mae Emily wedi bod yn arweinydd technegol cenedlaethol ar gyfer rhwydwaith SAYH ar gyfer maes thematig Camddefnydd Swydd at Ddiben Rhywiol. Yn y rôl hon mae hi wedi cyd-drefnu gwaith Cynghorwyr Technegol y sefydliad, wedi adolygu a gweithredu cyfarwyddyd i staff ac wedi gweithio gydag asiantaethau partner i adnabod themâu a dysgu. Mae hi wedi mynychu digwyddiadau bwrdd crwn a rhanddeiliaid allanol i rannu dysgu ac arferion gorau, â'r nod o adnabod y ffurf hon o lygredd a dal y rheini sy'n gyfrifol i gyfrif. Roedd Emily hefyd yn gyd-Arweinydd Gweithrediadol ar gyfer gwaith SAYH ar Drais yn Erbyn Menywod a Merched, a chynorthwyodd y tîm dynodedig gan weithio â'r nod o ysgogi gwelliannau i arferion plismona ac adeiladu hyder yn y rheini a all fod â rheswm i wneud cwyn.

Cyn ymuno â SAYH, gweithiodd Emily i'r Ombwdsmon Seneddol a Gwasanaeth Iechyd fel Rheolwr Ymchwiliadau a'r Cyngor Meddygol Cyffredinol fel Ymchwilydd.

Darllenodd Emily Gyfraith ym Mhrifysgol Warwick a chwblhaodd Ddiploma Ôl-raddedig mewn Ymarfer Cyfreithiol yn Ysgol Gyfraith Inns of Court. 

Ymunodd Catherine â'r IPCC yn 2006 fel prif ymchwilydd lle sicrhaodd gyfoeth o brofiad yn ymchwilio i amrywiaeth eang o ymchwiliadau proffil uchel a chymhleth. Ymunodd hi ag ymchwiliad Hillsborough yn 2013 a gweithiodd fel Dirprwy Uwch Ymchwilydd ac Uwch Ymchwilydd â chyfrifoldebau gan gynnwys datgelu, yr Ystafell Digwyddiadau Mawr, a chwynion. Cyn ei rôl bresennol, roedd Catherine wedi gweithio am bum mlynedd fel Rheolwr Gweithrediadau ar gyfer y Gogledd-Orllewin gan weithredu fel uwch wneuthurwr penderfyniadau ar ymchwiliadau difrifol a chymhleth.

Mae gan Catherine MSc mewn Troseddeg a Chyfiawnder Troseddol ac mae ganddi gefndir yn y gwasanaeth sifil.

Ymunodd Graham â'r IPCC ym Mai 2004 fel Ymchiliwr yn ein Swyddfa yn Llundain ac arweiniodd swyddfa Croydon ar y cyd fel Rheolwr Gweithrediadau. Roedd Graham yn ganolog i sefydlu tîm hyfforddi'r IPCC, rhaglen achredu a llawer o'r polisïau sy'n dal i gael eu hyrwyddo o fewn SAYH heddiw. Mae e'n dod â chyfoeth o brofiad gweithrediadol ac arweinyddiaeth i'w swydd wedi bod yn rhan o ac wedi goruchwylio nifer sylweddol o ymchwiliadau proffil uchel trwy gydol ei yrfa. Graham yw ein harweinydd cenedlaethol ar gyfer gwrthderfysgaeth ac ar hyn o bryd mae'n Uwch Berchennog Cyfrifol ar gyfer ein rhaglen Gwella Cyflawni Gweithrediadol (IOD), rhaglen tair blynedd wedi'i chynllunio i sicrhau bod y Gyfarwyddiaeth Weithrediadau yn gallu ateb heriau'r dyfodol. 

Cyn ymuno, gwasanaethodd â Lluoedd Arfog ei Mawrhydi a threuliodd chwe blynedd fel gweithredwr ac arweinydd tîm yn rhedeg gweithrediadau gwylio cudd yn y DU a thramor. Mae'n ymroddedig i ymgysylltu â rhanddeilaid, lles a datblygiad parhaus ein pobl a'n sefydliad, a gwella hyder cyhoeddus mewn plismona. 

Cyn cymryd ei rôl fel Cyfarwyddwr Rhanbathol yn SAYH, roedd Derrick yn Gomisiynydd IPCC, wedi ymuno â'r sefydliad yn Ionawr 2013. Fel pob comisiynydd gweithrediadol, roedd Derrick yn gyfrifol am ddarparu goruchwyliaeth annibynnol o, a chymryd cyfrifoldeb yn y pen draw dros, ein hymchwiliadau, gwaith achos a hyrwyddo hyder cyhoeddus yn y system gwynion. 

Roedd Derrick yn Brif Weithredwr y Cyngor Hawliau a Chydraddoldeb yn flaenorol a chyn hynny roedd yn Brif Swyddog Gweithredol Siambr Fasnach Sandwell. Mae ganddo hanes hir o weithio gyda chymunedau yn y DU, a sefydlodd a chadeiriodd nifer o Grwpiau Cynghori Annibynnol gan gynnwys Birmingham yn Lleihau Trais Gangiau 3. Cadeiriodd hefyd y Grŵp Cynghori Annibynnol Cenedlaethol, gan gynghori'r llywodraeth ar droseddu treisgar ac ymddygiad gwrthgymdeithasol ac eisteddodd ar y Grŵp Moeseg Cronfa Ddata DNA cenedlaethol o 2008-2013. 

Ymunodd David â'r IPCC ar y pryd yn 2004, ac mae wedi gweithio mewn amrywiaeth o rolau gweithrediadol dros y blynyddoedd, gan gynnwys Ymchwiliwr, Pennaeth Gwaith Achos ac, yn fwyaf diweddar, Pennaeth Gweithrediadau Cenedlaethol.  Daeth rôl cyfarwyddwr gyntaf David yn ystod 2019/20, pan ymgymerodd dros dro â rôl Cyfarwyddwr Rhanbarthol SAYH y Gogledd-Ddwyrain. Daeth David yn Gyfarwyddwr Rhanbarthol SAYH y De-Orllewin ym Mehefin 2021. Cymerodd rôl Cyfarwyddwr (Swyddfa Caerdydd) yn Ionawr 2023, ac mae'n gyfrifol yn awr am gyflawni gweithrediadol ar draws De-Orllewin Lloegr a Chymru.   

Wedi'i leoli yn swyddfa Caerdydd, mae David yn cyflawni ei gyfrifoldeb goruchwylio trwy gyfarfod yn rheolaidd  ag uwch swyddogion, Comisiynwyr Heddlu a Throseddu, swyddogion etholedig, cynrychiolwyr cymunedol a rhanddeiliaid lleol a chenedlaethol, i sicrhau cyfathrebu effeithiol ac agored. 

David hefyd yw ein prif noddwr i'r prosiect i gynllunio, adeiladu a gweithredu system reoli achosion newydd. Mae'r system newydd hon yn ganolog i redeg ein sefydliad yn llwyddiannus ac yn effeithlon. Mae cynllunio system fydd yn cefnogi cyflawni gweithrediadol ac yn ateb ein hanghenion ar gyfer y dyfodol yn flaenoriaeth allweddol o fewn ein strategaeth bum mlynedd. 

Mae Sarah ar hyn o bryd wedi'i secondio i weithredu fel y gwneuthurwr penderfyniadau ar gyfer cwynion a honiadau ymddygiad yn erbyn yr heddlu yn codi o drychineb stadiwm Hillsborough yn 1989. 

Ei rôl sylweddol yw Cyfarwyddwr Rhanbarthol ar gyfer y De-Ddwyrain. 

Sarah yw'r uwch noddwr i rwydweithiau staff Oedran a Pride LHDTC+ SAYH.

Cym ymuno â SAYH, roedd hi'n Bennaeth Gwasanaethau Cyfreithiol Asiantaeth Ddatblygu Dwyrain Lloegr. Cyn hynny, roedd Sarah Green yn gyfreithwraig ardal ar gyfer rhanbarth dwyreiniol y Bwrdd Cymorth Cyfreithiol ac wedyn daliodd nifer o rolau uwch reoli o fewn y Comisiwn Gwasanaethau Cyfreithiol.   

Cyn symud i'r sector cyhoeddus gweithiodd hi fel cyfreithwraig i gwmni mawr o gyfreithwyr sy'n cynrychioli cleientiaid undebau llafur, gan gynnwys arwain tîm cenedlaethol oedd yn gyfrifol am erlyniadau troseddol preifat ar ran gweithwyr sector cyhoeddus yr ymosodwyd arnynt yn y gwaith. 

Ymunodd Mel â'r IPCC yn 2004 ac mae wedi treulio'r rhan fwyaf o'i gyrfa yn ymchwilio, goruchwylio a gweithredu fel Gwneuthurwr Penderfyniadau ar achosion difrifol a  sensitif.  Mae ganddi brofiad helaeth o adolygu ymdriniaeth yr heddlu o Drais yn Erbyn Menywod a Merched, gan gynnwys adolygiad llofruddiaeth yn y cartref. Roedd hi'n gadeirydd cyntaf rhwydwaith arbenigol deunydd pwnc SAYH ar gamdriniaeth ddomestig ac mae'n gyn-Ymddiriedolwraig Cymorth i Ferched Cymru. Mae ei meysydd eraill o ddiddordeb proffesiynol yn cynnwys adolygu troseddau mawr, ymchwiliadau i bobl sydd ar goll, Camddefnydd Swydd at Ddiben Rhywiol (APSP), trwyddedu gynnau, ac arweinyddiaeth a rheoli. 

Mae Mel hefyd wedi arwain ar nifer o gynlluniau newid sefydliadol, gan sefydlu Rhaglen Hyfforddi Ymchwilwyr SAYH yn 2011, gan ysgrifennu cymhwyster achrediad ymchwiliwr arbennig i SAYH yn 2012, a datblygu timau ysgrifennu adroddiadau ymchwiliadol. Cyn cymryd ei rôl Cyfarwyddwraig yn Ionawr 2023, arweiniodd Mel dîm Ymchwiliadau Cymru/De-Orllewin fel Rheolwr Gweithrediadau am lawer o flynyddoedd, a gweithredodd hefyd fel Pennaeth Ansawdd, Safonau a Goruchwylio SAYH yn 2020/21. 

Cyn ymuno â SAYH darllenodd Mel gyfraith yng Ngholeg y Brenin Llundain. Ers hynny mae hi wedi cwblhau Meistr mewn Cyfraith ym Mhrifysgol Bryste, a MBA yn y Brifysgol Agored. Mae hi'n Rheolwr Siartredig ac yn ddarlithydd addysg uwch cymwysedig, ac mae hi wedi addysgu cyfraith yn rhan amser i oedolion ers 2003, yn fwyaf diweddar yn y Brifysgol Agored. Mae hi ar hyn o bryd yn cwblhau doethuriaeth ar ddylanwad tueddiadau gwybyddol ar wneud penderfyniadau ymchwiliadol.